रसुवाको टिमुरेमा बाढीको कहर: पीडितको आँसु पुछ्न फिल्डमै उत्रियो ‘द राइजिङ युवा क्लब’
रसुवाको टिमुरेमा बाढीको कहर: पीडितको आँसु पुछ्न फिल्डमै उत्रियो ‘द राइजिङ युवा क्लब’
काठमाडौँ। प्रकृति जब निष्ठुरी बनेर बर्सिन्छ, तब बस्तीहरू उजाडिन्छन्, सपनाहरू बग्छन् र बाँकी रहन्छन् केवल आँसु अनि चित्कार। रसुवाको टिमुरे क्षेत्रमा हालै आएको विनाशकारी बाढीले पनि धेरैको ओठको मुस्कान खोसेको छ, कैयौँ परिवारलाई पालमुनिको बास बनाएको छ। तर, यही कहालीलाग्दो विपद् र पीडाको बीचमा मानवीयताको न्यानो आशा जगाउँदै एउटा युवा टोली राहत र उद्धारका लागि अग्रसर भएको द राइजिङ युवा क्लब
बाढीको भयंकर रूपले पुर्याएको क्षति र प्रभावित नागरिकहरूको कारुणिक अवस्थालाई मध्यनजर गर्दै क्लबले केवल समवेदना मात्र प्रकट गरेन, बरु आफ्ना कदमहरू सोझै प्रभावित क्षेत्रतिरै बढाउने निर्णय गर्यो। क्लबका अध्यक्ष सुरेश डंगोल को नेतृत्वमा युवाहरूको यो टोली पीडितका आँसु पुछ्न र उनीहरूलाई पुनर्जीवनको आशा दिन आफैँ फिल्डमा खटिने भएको छ।
अध्यक्ष सुरेश डंगोलका अनुसार, क्लबले आफ्नो तर्फबाट हुनसक्ने सम्पूर्ण शक्ति र स्रोत लगाएर प्रत्यक्ष रूपमा उद्धार, राहत र पुनस्थापनामा सहयोग पुर्याउनेछ।
आफ्ना मान्छे, आफ्नै घरआँगन र जीवनभरको कमाइ आँखैअगाडि बाढीले बगाउँदाको पीडा कति गहिरो हुन्छ, त्यो शब्दमा व्यक्त गर्न सकिन्न,” अध्यक्ष डंगोल भन्नुहुन्छ, “यस्तो कठिन घडीमा हामी चुपचाप बसेर हेर्न सक्दैनौँ। हाम्रो सानो प्रयासले कसैको चुल्हो बल्न सक्छ, कसैको टाउकोमा ओत लाग्न सक्छ भने हामी किन पछि हट्ने?”
आफ्नो सीमित स्रोतसाधनबाट सेवाको यात्रा सुरु गरेको यस क्लबले सम्पूर्ण देश-विदेशमा रहनुभएका कोमल र सहयोगी मनहरूलाई पनि यस परोपकारी अभियानमा हातेमालो गर्न भावुक अपिल गरेको छ।
परदेश वा स्वदेशको कुनै पनि कुनामा हुनुहुन्छ भने, तपाईंले पठाएको सानोभन्दा सानो आर्थिक सहयोगले पनि बाढीपीडित परिवारका लागि ठूलो जीवनदान बन्न सक्छ। विपद्को यो अँध्यारोमा एउटा सानो बत्ती बनेर कसैको ओठमा मुस्कान फर्काउनु नै अहिलेको सबैभन्दा ठूलो धर्म हो।
आउनुहोस्, दुखको यो घडीमा एकजुट बनौँ, स्वार्थभन्दा माथि उठेर मानवीयताको हात बढाऔँ र टिमुरेका हाम्रा दाजुभाइ-दिदीबहिनीहरूलाई फेरि उभिन सहयोग गरौँ।
सहयोगका लागि
सुरेश डंगोल
अध्यक्ष, द राइजिङ युवा क्लब
९८५१२६९१००
